fbpx

زي ما دخلنا بالمعروف نخرج بالمعروف.

جملة أكيد سمعتها في فيلم أو مسلسل لما يكون إتنين بيتفقوا على الطلاق.

طب إزاي ممكن ندخل بالمعروف عشان نخرج بالمعروف؟

هل إحنا فعلاً بندخل بالمعروف؟

بداية الجواز على أساس سليم بتخلي الطلاق سهل و راقي و بدون مشاكل للزوج و الزوجة و الأهم الأولاد لأن الطلاق مش لازم يبقى بداية مشاكل ما بين الزوجين و الطلاق لو بشكل راقي ممكن يبقى بداية علاقة محترمة ما بين الراجل و الست بس لو إتبنى على أساس سليم و الأساس ده بيبدأ من الخطوبة.

في المقال ده حنتكلم عن الحاجات اللي لو خدنا بالنا منها وقت الجواز مش حتسبب مشاكل أثناء الطلاق.

مقدم الصداق:

المتعارف عليه في المجتمع المصري إن مقدم الصداق اللي بيقوم الزوج بدفعه مش هو اللي بيتكتب في وثيقة الزواج عشان المأذون ما ياخدش نسبة منه و دي أول غلطة بيقع فيها الطرفين أثناء كتابة عقد الزواج.

ليه؟

مش مهم يبقى مقدم الصداق أو المهر قليل أو كتير بس المهم إننا نكتب المبلغ الحقيقي اللى إتدفع لأن – لا قدر الله – لو الزوجة رفعت دعوى خلع على زوجها بيبقى مطلوب منها إرجاع المبلغ المكتوب في عقد الزواج و هنا الزوج بيبقى مش قادر يثبت إن المبلغ المكنوب مش حقيقي و إن مقدم الصداق أو المهر كان أكتر من كده.

المادة ( 20 ) من القانون رقم 1 لسنه 2000 و الخاص بتنظيم بعض أوضاع و إجراءات التقاضي في مسائل الأحوال الشخصية بتقول "للزوجين أن يتراضيا فيما بينهما  على الخلع , فان لم يتراضيا عليه و أقامت  الزوجة  دعواها بطلبه و افتدت نفسها و خالعت زوجها بالتنازل عن جميع حقوقها المالية و الشرعية و ردت عليه الصداق الذي أعطاه إياها ,  حكمت المحكمة بتطليقها عليه"

الصداق الذي أعطاه إياها معناه الصداق المكتوب في عقد الزواج لأن يصعب إثبات حاجة غير المكتوبة في عقد الزواج.

الأولاد

للأسف بعض الزوجات أو الأزواج بعد الطلاق أو قبله يستخدمون الأولاد يا إما للإنتقام من الطرف الآخر أو لمكاسب مادية و في الحالة دي المشاكل بدل ما تقل بتزيد.

إزاي؟

على سبيل المثال لو إمتنع الزوج عن دفع نفقة الأولاد القانون يسمح للزوجة إقامة دعوى حبس على الزوج حتى ترغمه على دفع مبلغ النفقة و المشكلة إن ساعتها بتطالبه بدفع مبلغ كبير و مجُمع.

المادة 76 مكرر/2,1 من القانون رقم 1 لسنة2000 المضافة بالقانون رقم 91 لسنة2000 بتقول " إذا إمتنع المحكوم علية عن تنفيذ الحكم النهائى الصادر فى دعاوى النفقات والاجور وما فى حكمها جاز للمحكوم له أن يرفع الأمر إلى المحكمة التى أصدرت الحكم أو التى يجرى التنفيذ بدائرتها ، ومتى ثبت لديها أن المحكوم علية قادر على القيام بأداء ما حكم به وأمرتة بالأداء ولم يمتثل حكمت بحبسة مدة لا تزيد على ثلاثين يوما ، فإذا أدى المحكوم علية ما حكم به أو أحضر كفيلا يقبلة الصادر لصالحة الحكم ، فإنة يخلى سبيله"

الكلام ده معناه إن يا الدفع يا الحبس زي ما بيقولوه في الأفلام.

مثال آخر:

لو الزوجة منعت الأب إنه يشوف ولاده بسبب إنه ما بيدفعش النفقة أو أي سبب آخر أو بدون سبب من حق الزوج إنه يرفع دعوى رؤية و المحكمة تحكم للزوج برؤية أولاده و لو إمتنعت الزوجة عن تنفيذ حكم الرؤية من حق الزوج رفع دعوي ضم للصغار يعني الأولاد يروحوا لحد تاني غير الزوجة.

و أمثلة تانية كثير.

يمكن تدارك كل المشاكل التي تقع أثناء و بعد الطلاق دون اللجوء للمحاكم لو كان في حاجتين من الأول متفقين عليهم وضوح في كل شئ من أول الخطوبة و عدم إستخدام الأولاد في الخلافات ما بين الطرفين.


Leave A Comment

لن يتم نشر عنوان بريدك الإلكتروني. الحقول الإلزامية مشار إليها بـ *

WhatsApp chat